全港中學教學語言又起變動，行咗十年嘅中文中學、英文中學，無形被結束喇！改為走「彈性班」，簡單嚟講，容許成續好嘅，可以彈性分科目、分組、分時段去開英文班。

被政府搞到一頭煙，彈性班，咩嚟？「彈弓手」就知係咩，係一種手部勞損嘅毛病，主因都係經常重覆做同一組動作，例如扭動毛巾，我隻右手手指公骹位，就出現勞損毛病，試過可以因為手指公無法用力，右手便無法使用，要做物理治療。

記得我哋讀中學時期嘅教學政策夠簡單。

除非係學校自己已經定咗位，否則全港學校都係分為Band1 to 5五組，我間中學除咗中文、中國文學、中國歷史外，其他科目一律係英文，大家齊齊照樣讀，上堂時照用母語（廣東話）教學，交功課、考試時就用番英文寫essay、答案。都幾好呀！

成個教育政策係咁，想繼續係香港升讀大學，就參加公開試，會考、高考，去評所有學生公開試成續定生死。

學校被評係咩組別，就係靠班學生考到幾多個A、B、C、D、E、F；記得當時老師真係同班學生一齊苦讀，製作notes‥‥‥大部分都係睇學生本身有幾資質、有幾係努力。

事到今日，整個教學語言政策，令到新一代學生力不從心，一時一樣，之前嘅中中、英中同學已經係一班白老鼠，經常被人評論話英文唔掂、中文又唔係叻。到剛公布呢個彈性班，又苦了學生，唔知又會犧牲幾多學生？

究竟要用邊種教學語言？根本唔係一套政策可以搞掂，最緊要係啲師資質素，師資質素唔得，俾你夠班去開什麼彈性班、用到英文教學，原來啲老師英文水平都有限，咪一樣唔掂。