08年尾金融海嘯、09年頭聲稱賀新年，開倉已經成行成市，無論係衣服鞋履、抑或係家居用品、家電產品，各種品牌、連鎖店都紛紛打着開倉名義，實行係要錢唔要貨。
自己因應工作地點之故，經常亦係街頭見到啲人派傳單，寫明邊度邊度開倉、全場貨品一折起。
同一件貨，開倉前買到幾百蚊，開倉期可以降到用一折發售，好似同一件名牌子外套，係大型商場裏面賣緊幾千蚊，開倉期，可以唔駛三舊水就買到，中間嘅折算、真係慳番唔少，再用慳到嘅錢，又可以買多好幾件其他配飾、配襯衣物。
無他嘅，經濟好時，啲人可以唔駛睇價錢去買嘢，但一場金融海嘯後，人人都㩒實荷包，唔敢亂駛錢，根本唔知呢場海嘯會去到何時，而家就係「Cash is the King」，寧願留番多啲錢，真係話唔埋，聽日返工就收到大信封，份工無埋。
兩個星期後，就係農曆新年，係新年前仲有啲調查，話訪問市民今年會封幾多錢利是，我估今年啲人封利是錢會縮水，以往普遍平均係廿蚊一封，或者有機會係十蚊封，唔知準唔準，相信好快會有呢類調查出籠！
