近日睇新聞，唔係呢間裁員，就係嗰間減薪，裁裁裁‥‥此起彼落，好似話俾大家：金融風暴下，人人自危，隨時下一個係你。（touch wood）
要點做去自保？
最簡單係，收一萬蚊人工，就唔好只係交一萬蚊嘅功夫，仲之交得越多功夫，越顯示你係公司嘅價值。同埋，交貨準時係最基本嘅，一定要交啲靚貨、交啲正嘢。
但回顧番我哋政府，高官交貨跟本同人工，唔係成正比，點解啲高官唔減薪？
財爺曾俊華今午係一個場合上被問及特道同高官人工咁高，不如考慮減薪，曾俊華回應，高官減薪能慳番嘅數目，相對政府開支，只係一個小數目，對財政起唔到咩作用。
其實，佢真係唔應該咁樣去回應，高官帶頭減薪，係有政治穩定作用。
睇吓每次遇到什麼風吹草動、股災、經濟下滑，打工仔就係被人開刀嘅一群，公務員更顯得係一個鐵飯，結果每次有政府空缺，仲會見到幾千、或幾萬人去爭一個位，爭崩頭。
係今日環境經濟前景唔明朗下，政府都要認真考慮下高官減薪，安撫下社會上嘅不滿情緒。
