環保生活，係咪淨係少用膠袋、少製造垃圾、少用化學物品‥‥‥就已足夠呢？

我覺得應該仲要減少製造「噪音」，最常聽到嘅噪音：

好似開住架改裝引擎嘅車，係紅綠燈前開大引擎，好似要話俾你啲人知睇吓我幾巴閉正車嚟㗎；

又好似搭巴士咁，明知係坐緊公共交通工具，唔係私家車，人多時候，仲會有肌膚掂撞，跟住就發啲「唧唧聲」，其實明話俾隔鄰位人知「你掂到我啦，好彈開啦」；

又好似排隊㩒錢，有啲人會係ATM處理轉賬、交數，做好多嘢，遇着後面啲唔耐煩嘅人，又會發出唔耐煩嘅聲音；

搭商場電梯，有唔同嘅人就唔同需要而去唔同樓層，自然就有機會層層停，但遇着有啲人要去高樓，又唔耐煩要部lift層層停，就嗡嗡聲話：「真係煩，阻住哂」‥‥‥

其實圍繞住大家嘅「噪音」例子，多不勝數。原因係大家自私，唔想俾人阻住自己時間，正所謂阻住地球轉。

但其實大家應該要學吓放鬆，係今日經濟衰退，人人飯碗自危，精神壓力已經好大，再造埋啲咁嘅「噪音」，何苦呢？

相信大家有機會去過旅行，有冇發覺香港人係特別多牢騷，就算放假都唔似放假，仍然係趕住去邊去邊，根本無法享受咁難得公司批准可以放假嘅真正意義。

或者，再唔放鬆吓，人都瘋癲啦！