成日聽人講，人大咗，會更怕死？我唔。但我只知道人大咗，係飲食方面，更加追求健康元素。

細嗰時候，見到甜食就不得了，簡直係要大口大口，慌死會執輸，好似飲蜜糖，媽咪只加一湯匙蜜糖去沖水，但自己永遠乞求要多啲啦，甜啲好味啲；好似飲何華田，何華田粉佔大半杯；好似食花生醬煉奶面包，花生醬就會搽到厚厚一層，煉奶呢，就搽到漏哂出嚟；蜜牙糖餅乾，嘩，不得了，一盒蜜牙糖，唔駛三、兩日食埋，當然跟住被媽咪鬧，話以後都唔買俾你，咁快食完‥‥‥總之，就係嗜甜如命。

再大少少，就鍾意食煎炸熱氣香口嘅、汽水、雪糕‥‥‥統統都係致肥零食，結果食零食當食正餐，好彩係發育期未有導致癡肥後果。

人大咗，口味轉趨清淡，寧願食住家飯，蒸為佳，就算要外出食飯，都唔會好似咁煎炸，都係離不開清蒸，菜更要走油煮，多油嘅，仲要自己過水‥‥‥

細嗰唔食嘅苦瓜，而家竟然會食。記得細嗰媽咪監住食苦瓜，話清熱氣，食多啲，我只好硬住頭皮，挾多塊菜，包住苦瓜，一齊食，收起味蕾，求其咬幾啖，就吞咗，仲慘過食苦藥。

無他，因為人大咗，曾經有人講過，人大咗，經歷多咗，有啲更比食苦瓜更苦，咁苦瓜就變得甜咗，所以好多人會係大咗多後才會去食苦瓜，所以苦瓜又名「半生瓜」。

或者飲食正反映你想追求咩生活，問我？我會答，我想追求一餐簡單健康嘅飯，或者具體啲講，三、四口子坐埋係一張枱，三餸一湯，開開心心閒話家常，有時候鬥吓氣、駁吓咀，有時候又講吓笑話，互訴心事。