一則真人真事嘅辦公室笑話：

話說有一位好鬼惡嘅阿四，惡到可以鬧老闆、發老闆脾氣，勁到經常口講要辭職，但仍然面皮厚嘅繼續留係老闆身邊。

你會問點樣惡法？

簡單舉一個實例：阿四同老闆匯報工作進度，講到某一件事，兩個人意見不合，（其實好正常啫！）就會好似火星撞地球，互相勁片，跟住阿四會彈返埋位，但條氣唔順，再走返去老闆房門口，企喺門口再鬧過，然後再返埋位，自己係嗰位到再發脾氣。

但未完呀！因為老闆條氣都唔順，老闆再行埋嚟阿四嗰位，但距離五十米位置，直斥阿四：「又話辭職，但你仲唔走」；阿四即刻駁火：「你都未俾埋啲人工我！」

試問你見過呢類打工仔，可以兇番老闆、無大無細？

簡單例子後，講番嗰則真人真事嘅笑話。

阿四近日為咗幫老闆開多一個辦事處一事，經常埋怨老闆遲遲唔俾指示，所以阿四同老闆關係持續惡劣，老闆厭阿四煩，兩個人開完片後，老闆終於頂佢唔順，結果即刻簽咗張仲未有銀碼嘅支票，叫CFO找埋阿四條人工、補水，叫阿四即走無得留低。嘩，阿四知道，勁hurt呀。

阿四即刻四圍搵藉口、諗計點樣令自己留番低，佢同老闆講，手頭上仲有啲嘢未做完，想話跟埋先，好頭好尾，但老闆無啋佢一眼。

阿四唔知點算好，四圍同人講又俾老闆炒（阿四習慣一俾老闆趕走，就會幫自己唱通街），其中同老闆司機講開，阿四問司機：「都唔知邊嗰得罪老闆，搞到老闆咁鬼火？」司機心諗：「係人都知道，係你呢個阿四經常激到老闆生蝦咁跳！唯獨你阿四係無知啫！」