慳家係好。但係如果慳家好似下面呢個人物咁，你又會點睇？

一位跟得阿四，經常跟住老闆出入，包括與會、商務飯局。

佢自稱自己好環保，好似紙張一定要雙面用，信封要循環使用，甚至幫老闆安排飯局，會將食剩啲餸、甜品打包走。

打包啲餸無所謂，老闆係主人家，我覺得都還可以。但倘若係人哋做主人家，你係客人嘅時候，似乎有點唔係咁好睇。

跟得阿四有一日同老闆出席飯局，老闆係客人。阿四食完飯局返辦公室，即刻同同事丙講：「今日真係食剩好多、好多、好多嘢，好鬼想打包哂返嚟，主人家都話好呀㖭！」

同事丙望住阿四，「O」嘴，心諗阿四，你係咪咁cheap呀？

其實，阿四打包啲食剩嘅嘢係一個習慣， 每次飯局返公司，佢總會大包小包數包咁將食剩啲嘢帶返公司，美其名係同大家分享，但係佢永遠唔會問你介唔介意嗎。

佢都係得一個肚、一個胃，打包哂啲嘢，自己又食唔哂；而最根本係大家都無興趣食，結果佢最後會四圍叫老闆秘書呀、阿嬸呀，帶埋返屋企做餸。

你問我？我其實都唔食，就算係老闆喺極之高檔嘅食肆到請客食飯，但始終都係人哋食剩，都唔係自己食剩，就算幾好食，感覺都唔係咁好。